Աշխատակիցը հեռանում է ընկերությունից, որոշ ժամանակ անց նոր փորձ ձեռք բերում և վերադառնում նույն թիմ։ Առաջին հայացքից սա կարող է անսովոր թվալ, սակայն աշխատաշուկայում նման դեպքերը գնալով ավելի են տարածվում։ Սա հաճախ անվանում են «boomerang hiring»՝ նախկին աշխատակցին կրկին աշխատանքի ընդունելու պրակտիկա։

Բայց արդյո՞ք նախկին աշխատակցի վերադարձը միշտ լավ որոշում է։ Այստեղ կարևոր է հասկանալ, թե ինչու է մարդը հեռացել, ինչ է փոխվել նրա բացակայության ընթացքում և ինչու է այժմ ցանկանում վերադառնալ։

Եթե աշխատակիցը հեռացել է մասնագիտական զարգացման, նոր փորձ ձեռք բերելու կամ այլ ոլորտում իրեն փորձելու համար, վերադարձը կարող է երկու կողմերի համար էլ հետաքրքիր հնարավորություն լինել։ Այդ ընթացքում նա ձեռք է բերել նոր հմտություններ, այլ աշխատանքային մշակույթի հետ ծանոթացել կամ աշխատել նոր գործիքների և գործընթացների հետ։ Այս դեպքում ընկերությունը ստանում է արդեն ծանոթ մասնագետի, որն իր հետ բերում է նաև նոր փորձ։

Մյուս առավելությունն այն է, որ նախկին աշխատակցի ադապտացիան կարող է ավելի հեշտ լինել։ Նա արդեն ծանոթ է ընկերության մշակույթին, թիմին, աշխատանքային սկզբունքներին և որոշ գործընթացների։ 

Սակայն նախկին աշխատակցին վերադարձնելու որոշումը չպետք է հիմնված լինի միայն այն փաստի վրա, որ նրան արդեն ճանաչում եք։ Կարևոր է գնահատել նրա ներկայիս հմտությունները և հասկանալ՝ դրանք համապատասխանո՞ւմ են այսօրվա պահանջներին։ Կարևոր է նաև քննարկել հեռանալու պատճառները։ Եթե դրանք կապված էին խնդիրների հետ, որոնք դեռ չեն լուծվել, վերադարձը կարող է նույն իրավիճակի կրկնության բերել։

Հարցազրույցի ժամանակ արժե քննարկել նաև, թե ինչ է փոխվել երկու կողմերի համար։ Ի՞նչ է ակնկալում աշխատակիցը։ Ի՞նչ է ակնկալում ընկերությունը։ Արդյո՞ք նախկին պաշտոնն է առաջարկվում, թե՞ նորը՝ ավելի մեծ պատասխանատվությամբ։

Boomerang hiring-ը կարող է աշխատել հատկապես այն դեպքում, երբ վերադարձը ոչ թե պարզապես անցյալին վերադառնալ է, այլ նոր փուլ սկսելու հնարավորություն։