Աշխատավայրում կան բազմաթիվ գործոններ, որոնք խանգարում են կենտրոնանալ, նվազեցնում են արդյունավետությունը և ստիպում երկար ժամանակ ծախսել նույնիսկ պարզ առաջադրանքների վրա։ Ահա դրանցից մի քանիսը։

Սոցցանցեր

Մի քանի րոպե Instagram կամ TikTok բացելու մտադրությունը շատ արագ կարող է վերածվել կես ժամի։ Սոցցանցերը նախագծված են այնպես, որ պահեն մարդու ուշադրությունը հնարավորինս երկար։ Հետևաբար, աշխատանքի ընթացքում անջատեք ծանուցումները, սահմանեք կոնկրետ ժամեր՝ սոցցանցեր մտնելու համար։ Կարող եք նաև օգտագործել հավելվածներ, որոնք ժամանակավորապես արգելափակում են սոցցանցերը:

Ընդհատումները

Զանգերը, նամակները, գործընկերների հարցերը կամ հաղորդագրությունները շեղում են ուշադրությունը։ Ամեն ընդհատումից հետո ուղեղին ժամանակ է պետք նորից կենտրոնանալու համար։ Խնդրեք գործընկերներին մի որոշ ժամանակ ձեզ չանհանգստացնել, իսկ նամակները ստուգելու համար հստակ ժամեր սահմանեք։

Մուլտիթասքինգ

Շատերը կարծում են, թե միաժամանակ մի քանի գործ անելն ավելի արդյունավետ է։ Սակայն իրականում մարդը պարզապես արագ անցնում է մի առաջադրանքից մյուսին, ինչի պատճառով թուլանում է կենտրոնացումը և մեծանում սխալների հավանականությունը։ Ավելի արդյունավետ է մեկ գործն ավարտելը և հետո հաջորդին անցնելը։

Պլանի բացակայություն

Եթե օրը սկսվում է առանց հստակ ծրագրի, ժամանակի մեծ մասը կարող է անցնել պարզապես մտածելով՝ ինչից սկսել։ Ժամանակի կառավարման մասնագետները հաճախ խորհուրդ են տալիս օգտագործել «time blocking» մեթոդը՝ օրը բաժանել կոնկրետ ժամանակային հատվածների և յուրաքանչյուր հատված հատկացնել մեկ առաջադրանքի, օրինակ, 10:00–11:00 — նամակներ, 11:00–13:00 — հիմնական նախագիծ, 14:00–15:00 — հանդիպումներ։

Հետաձգելու սովորությունը

Որքան երկար ենք հետաձգում գործը, այնքան այն ավելի ծանր է թվում։ Փորձեք սկսել ամենաբարդ գործից կամ մեծ առաջադրանքը բաժանեք փոքր մասերի և պարզապես սկսեք։ Շատ դեպքերում ամենադժվարը հենց սկսելն է։

Անկազմակերպ միջավայր

Խառը աշխատասեղանը, ամենուր թափթփված ֆայլերը կամ անընդհատ ինչ-որ բան փնտրելը նույնպես ժամանակի մեծ կորուստ են։ Փոքր փոփոխությունները կարող են մեծ ազդեցություն ունենալ, օրինակ, դասավորեք ֆայլերը, մաքրեք աշխատասեղանը, պահեք հաճախ օգտագործվող նյութերը հեշտ հասանելի վայրում։

Անհարկի հանդիպումներ

Ոչ բոլոր հանդիպումներն են անհրաժեշտ։ Երբեմն մի քանի նախադասությամբ նամակը կարող է փոխարինել մեկ ժամանոց հանդիպմանը։ Հանդիպում նշանակելուց առաջ արժե մտածել, թե հնարավոր չէ՞ արդյոք հարցը լուծել հաղորդագրությամբ։