Ի՞նչ է աշխատանքային անվտանգությունը և ինչո՞ւ է այն արդիական
06.03.2025
3063 դիտում
Աշխատանքային անվտանգության նպատակը աշխատողների առողջության ու բարեկեցության ապահովումն է, դժբախտ պատահարների և մասնագիտական հիվանդությունների ռիսկերի նվազեցումը: Ժամանակակից փոփոխվող աշխատաշուկայում դրա նշանակությունը միայն ավելանում է՝ պայմանավորված նոր տեխնոլոգիաների, աշխատանքի ավտոմատացման, հեռավար աշխատանքի, կլիմայական փոփոխությունների և մի շարք այլ գործոնների ազդեցությամբ:
Աշխատանքային անվտանգությունը ենթադրում է աշխատավայրում ռիսկերի կառավարում՝ պաշտպանելով աշխատողներին վնասվածքներից, հիվանդություններից և մահացությունից: Այս խնդիրը արդիական է հատկապես այն պայմաններում, երբ աշխատաշուկան փոխվում է, ավելանում են նոր մասնագիտություններ, իսկ տեխնոլոգիական զարգացումները պահանջում են նոր մոտեցումներ աշխատանքի կազմակերպման և վերահսկման հարցերում։
Ինչո՞ւ է աշխատանքային անվտանգության ապահովումն արդիական
Անդրադառնանք մի քանի հիմնական պատճառների, թե ինչու է աշխատանքային անվտանգության ապահովման հարցը ներկայումս ավելի ու ավելի կարևոր դառնում։
Աշխատանքային վնասվածքների և մասնագիտական հիվանդությունների աճ
Վերջին տասնամյակներում աշխատանքի բնույթի փոփոխությունները մեծացրել են որոշակի հիվանդությունների ռիսկը՝ ներառյալ մկանային-կմախքային խանգարումները, սթրեսի արդյունքում առաջացող առողջական խնդիրները, ինչպես նաև քիմիական ու կենսաբանական ռիսկերը որոշ ոլորտներում:
Տեխնոլոգիական զարգացումներ և նոր վտանգներ
Ավտոմատացման և թվայնացման աճը հանգեցրել է նոր վտանգների՝ կապված ռոբոտների հետ փոխգործակցության, տվյալների անվտանգության և աշխատողների հոգեբանական առողջության հետ: Այդ իսկ պատճառով անհրաժեշտ է վերանայել ավանդական մոտեցումները և ներդնել աշխատանքային անվտանգության նոր չափանիշներ:
Իրավական և տնտեսական ասպեկտներ
Աշխատանքային անվտանգության խախտումներն ունեն ոչ միայն սոցիալական, այլև տնտեսական հետևանքներ. ընկերությունները կրում են բարձր տուգանքներ, աշխատողներն ունենում են երկարատև անաշխատունակություն, իսկ կառավարությունները բախվում են լրացուցիչ բյուջետային ծախսերի: Համաձայն ԵՄ անվտանգության և առողջության գործակալության տվյալների՝ անվտանգ աշխատատեղերը կարող են բարձրացնել արտադրողականությունը մինչև 20%:
Այսպիսով, աշխատանքային անվտանգության արդիականությունը պայմանավորված է աշխատաշուկայի և տեխնոլոգիաների անընդհատ փոփոխությամբ, առողջապահական նոր մարտահրավերներով և իրավական պահանջների խստացմամբ: Հետևաբար, անհրաժեշտ է մշակել նոր մոտեցումներ, կրթական ծրագրեր և արդյունավետ վերահսկողական մեխանիզմներ՝ աշխատողների անվտանգությունն ապահովելու համար։
Լիանա Խաչատրյան ՀԱԱՀ-ի տեխնիկական գիտությունների թեկնածու դոցենտ(Տ.Գ.Թ. դոց.)աշխատանքի անվտանգության փորձագետ
Ձեզ կհետաքրքրեն
