Տեղադրեք մեր անվճար հավելվածը: Այն շատ տեղ չի զբաղեցնի ձեր սարքի վրա
Խորհուրդներ դիմորդներին

5 հմտություն, որ պետք կգան քեզ աշխատավայրում

19.03.2020 | 8370 դիտում

Որո՞նք են փափուկ հմտությունները

Փափուկ ենք կոչում այն հմտությունները, որոնք կարևոր են կարիերայի համար, բայց հանդիսանում են ոչ մասնագիտական, վերմասնագիտական։ Այս որակները հիմնականում կախված չեն մասնագիտական գիտելիքներից և կապված են անձնային որակների, դիրքորոշումների և սոցիալական հմտությունների հետ:

2020 թվականը նոր մարտահրավերներ է բերում աշխատավայր, որոնք հաղթելու համար պետք է զարգացնել որոշակի հատկանիշներ։

Որո՞նք են այն 5 հմտությունները, որ պետք է ունենաս 2020 թվականին

1․ Աճելու տրամադրվածություն

Ընկերություններից շատերը, երբ թիմ են ընդունում նոր աշխատակցի, ակնկալում են, որ նա կլինի նպատակասլաց, կուզենա նոր բարձունքներ նվաճել, պայքարել առաջխաղացման ու կարիերայի աճի համար։ 

Աճելու տրամադրվածություն ունեցող մարդիկ հակված են կարծել, որ իրենք կարող են հասնել բարձունքների ժրաջան աշխատանքի շնորհիվ։ Նրանք չեն դադարում սովորել, կատարելագործվել, իսկ դա շատ կարևոր է ընկերության զարգացման համար․ ընկերությունը չի կարող զարգանալ, եթե չեն զարգանում աշխատակիցները։ Ղեկավարները դա հասկանում են և հավաքագրման փուլում ուշադրություն դարձնում՝ ձգտո՞ղ է թեկնածուն, թե՞ կբավարարվի և՛ փոքր աշխատավարձով, և՛ կարիերայի ստատիկությամբ։

 

2․ Կրեատիվություն

Հաճախ այնպիսի տպավորություն է, որ կրեատիվությունը պարզապես ծեծված բառ է և այն օգտագործում են պատեհ-անպատեհ։ Իրականում մենք ապրում ենք գաղափարների դարում, ամենաթանկը գնահատվում են գաղափարը, միտքը։ Կրեատիվ լինելու համար անհրաժեշտ է անընդհատ կրթվել՝ բառի բոլոր իմաստներով։ Կրեատիվությունը ծնվում է, երբ հանդիպում են մասնագիտական գիտելիքները և արվեստը։

Կրեատիվ լինելու համար պետք է քաջ լինել, անել մեկ քայլ ավելին, քան սովոր ես անել։ Կրեատիվությունը սիրում է ազատություն, տարածություն․ դժվար թե նեղվածքում նստած աշխատակիցները, ովքեր աշխատանքի են եկել ուղիղ ժամը 9։00-ին և ունեն 30 րոպե տևողությամբ ընդմիջում, տպավորեն գործատուին կրեատիվ մտքերով։

Կրեատիվությունը բարձր է գնահատվում, բայց դրան հասնել շատ բարդ է։

 

3․ Կենտրոնացված աշխատելու կարողություն

Կենտրոնացված աշխատելը բավականին բարդ է․ թիմում կան շատախոս ու հետաքրքիր մարդիկ, ում հետ ուզում ես շփվել, սոցիալական ցանցերում նամակներ ես ստանում և երկխոսությունների մեջ հայտնվում։

Աշխատավայրում շատ-շատ են ուշադրությունը շեղող հանգամանքները, և դրանց ընդհանրապես ուշադրություն չդարձնել պարզապես անհնար է։ Կենտրոնացվածությունը պահանջում է մեծ ջանքեր, բայց արդյունքը զարմացնող է՝ բարձրանում են աշխատունակությունը, ոգևորվածությունը, արդյունավետությունը։

Գործատուների համար շատ կարևոր է, որ նայեն ու տեսնեն՝ աշխատակիցն աշխատում է, ոչ թե չաթ է անում կամ զրուցում մյուսների հետ։ Վերջին հաշվով, աշխատակիցը վարձատրվում է աշխատանքի, ոչ թե ժամանացի դիմաց։

 

4․ Հաղորդակցման հմտություններ

Հաղորդակցումն ունի որոշակի կանոններ․ շփումը պետք է լինի պարզ, բացառվեն երկիմաստությունն ու ավելորդ մանրամասները։ Սխալ հաղորդակցումը կարող է թանկ նստել ընկերությունների վրա․ հաճախորդների հետ սխալ հաղորդակցման դեպքում նրանք հեռանում են։

Աշխատակիցների միջանձնային հաղորդակցումից կախված է արդյունքը․ եթե մարքեթոլոգն ու դիզայները չեն հասկանում միմյանց, չեն կարող ստանալ ամբողջական պրոդուկտ։

Ի դեպ, սա վերաբերում է ոչ միայն բանավոր, այլ նաև գրավոր հաղորդակցմանը։ Գրելու միջոցով արտահայտվում է մեր վերաբերմունքը, իսկ աշխատանքային միջավայրում այն պարտադիր պետք է լինի հարգալից։ Լատինատառը, անհասկանալի ձևակերպումները, կիսատ մտքերը վատ ընտրություն են, եթե գործնական նամակագրություն ես վարում։

 

5․ Քննադատական մտածողություն

Ոչ, խոսքն անդադար ամեն ինչ քննադատելու և բողոքելու մասին չէ։ Քննադատական մտածողությունը 21-րդ դարի ամենակարևոր հատկանիշներից է։ Տեղեկատվությունն այնքան շատ է, որ պետք է սթափ լինել ու չկլանել կեղծ նորություններն ու տեղեկատվական աղբը։ Ցանկացած բանի պետք է մոտենալ վերապահությամբ՝ անգամ սեփական հաջողություններին։ 

Քննադատական մտածողությունը սերտորեն կապված է տրամաբանության հետ և հնարավորություն է տալիս մտքեր գեներացնել, խնդիրներ լուծել։ Բացի այդ՝ մի շարք խնդիրներից կարելի է խուսափել, եթե քննադատաբար մոտենալ հարցին։

 

Անհրաժեշտ փափուկ հմտությունների շարքը կարող ենք լրացնել այնպիսի հատկանիշներով և հմտություններով, ինչպիսիք են էմոցիոնալ ինտելեկտը, առաջնորդությունը, ընկերության կորպորատիվ մշակույթին համապատասխանելը։

Սրանք այն հմտություններն են, որոնք անհրաժեշտ են ինչպես գործատուին, այնպես էլ աշխատակցին՝ արդյունավետ աշխատանքի և թիմում ներգրավվելու համար։

Կհետաքրքրեն նաև