Get our free app. It won't take up space on your device
Խորհուրդներ դիմորդներին

7 սովորություն՝ բնորոշ արդյունավետ աշխատողներին

4/21/2023 | 2058 views

Երբևէ ձեզ թվացե՞լ է, թե աշխատանքային օրը չափազանց կարճ է ամեն ինչ հասցնելու համար, մտածե՞լ եք, թե ինչ արագ է անցնում այն և որքան առաջադրանքներ են մնում չկատարված։ 

 

Երկարատև հանդիպումները և քննարկումները, որոշումների կայացման ոչ արդյունավետ մեխանիզմները և իհարկե ամեն օր էլեկտրոնային փոստում պատասխանի սպասող բազմաթիվ նամակները տանում են ձեր աշխատանքային ժամանակի զգալի մասը։  Եթե ժամանակատար պարտականություններին գումարենք արդյունավետությանը խոչընդոտող գործոնները, ապա նախատեսված բոլոր աշխատանքները հաջողությամբ ավարտելը կարող է լուրջ խնդիր դառնալ։ Արդյունքում  մնում է մի քանի տարբերակ՝ արտաժամյա աշխատել գրասենյակում, կիսատ թողած գործը շարունակել տանը կամ ավարտել այն հաջորդ օրը։

 

Աշխատանքային արդյունավետության մակարդակի վրա ազդող բազմաթիվ գործոններ կան: Դրանցից որոշներն անխուսափելի են, և դուք չեք կարող դրանց վրա ազդեցություն ունենալ, ինչպես օրինակ երկարատև հանդիպումները, որոնց ձեր մասնակցությունը պարտադիր է։ Սակայն քիչ չեն նաև այնպիսի գործոնները, որոնք ինքներդ կարող եք վերահսկել։ Այս գործում ձեզ կօգնեն մի քանի սովորություններ, որոնք  զարգացնելով, կարող եք կենտրոնացած, մոտիվացված և կազմակերպված մնալ աշխատանքային ողջ գործընթացում:

 

Նախապես պլանավորեք աշխատանքը

Ամեն օր կազմեք օրվա անելիքների ցանկ և դասակարգեք դրանք` ըստ առաջնահերթության։ Դա թույլ կտա կազմակերպել աշխատանքը՝ չմոռանալով ամենակարևոր և հրատապ գործերի մասին։ 

Կան առաջնահերթությունների դասակարգման բազմաթիվ մեթոդներ, որոնց մեջ իր արդյունավետությամբ առանձնանում է 80/20 կանոնը։ Վերջինիս համաձայն՝ ձեր բոլոր անելիքների միայն մոտ 20%-ն է ստեղծում անհրաժեշտ արդյունքների մոտ 80%-ը: Մյուս կողմից, առաջադրանքների մնացած 80%-ն ապահովում է ձեր ուզած արդյունքների միայն 20%-ը: Պարզեք, թե որ գործերն են ամենաշատ արդյունքներն ապահովում և սկսեք դրանցից։

 

 

Սահմանեք վերջնաժամկետներ

Ժամանակի արդյունավետ կառավարման գործում ձեզ մեծապես կօգնեն վերջնաժամկետները։ Իմանալով, որ տվյալ առաջադրանքի կատարման համար ունեք սահմանափակ ժամանակ, այն խելամտորեն կօգտագործեք և ավելի կենտրոնացած կաշխատեք: Վերջնաժամկետներ սահմանելիս իրատես եղեք․ գնահատեք առաջադրանքի բարդությունը և ժամանակատար լինելը և ապա սահմանեք կատարման վերջնաժամկետ։ 

 

Սկսեք ամենաբարդ առաջադրանքից

Որպես կանոն, օրվա սկզբում մարդը լի է էներգիայով և ավելի հեշտությամբ է կենտրոնանում աշխատանքի վրա։ Առաջնահերթություն տալով ձեր ամենաբարդ առաջադրանքին՝ կկարողանաք անհրաժեշտ ուշադրություն և ջանքեր հատկացնել դրա կատարմանը։ 

 

Այն ավարտելը կմոտիվացնի ձեզ և կնպաստի, որ դրական տրամադրվածությամբ անցնեք մյուս գործերին, որոնք համեմատության մեջ ավելի հեշտ կթվան  և որոնց կատարման համար ավելի քիչ ջանքեր կպահանջվեն։ Այս դեպքում նվազում է նաև սթրեսային վիճակում հայտնվելու վտանգը․ չէ՞ որ բավականաչափ ժամանակ ունեք առաջադրանքն ավարտելու համար: 

Ամենաբարդ առաջադրանքից սկսելը կարող է ձեզ ետ պահել այն հետաձգելու ցանկությունից։ Ավելի արդյունավետ է կենտրոնանալ և ավարտին հասցնել բարդ աշխատանքը, քան պակաս կարևոր խնդիրների վրա ծախսել ջանքերը և պարբերաբար հետաձգել կարևորագույն անելիքները։


Կարճ ընդմիջումներ արեք

Կարճ ընդմիջումներն օգնում են թարմանալ և նվազեցնում են աշխատանքային սթրեսի հավանականությունը։

Կարող է սխալ տպավորություն ստեղծվել, թե այն մարդիկ, ովքեր աշխատում են առանց ընդմիջումների, ավելի շատ բան են հասցնում անել։ Իրականում նրանք պարզապես զբաղված են աշխատանքով, ինչը բնավ չի վկայում արդյունավետության մասին։ Արդյունավետ աշխատող մարդիկ գիտեն կարճ ընդմիջումների իրական արժեքը և գերադասում են երկար ընդմիջումների փոխարեն 5-10 րոպե տևողությամբ դադարները։

 

 

Խուսափեք միանգամից մի քանի առաջադրանք կատարելուց

Շատ հաճախ խրախուսվում է միանգամից մի քանի առաջադրանք կատարելու հմտությունը (multitasking)։ Սակայն հնարավոր չէ ուշադրությունը լիարժեքորեն կենտրոնացնել միանգամից մի քանի առաջադրանքների վրա, հետևաբար ստիպված եք լինելու ընդհատել մեկը և անցնել մյուսին։ Միայն մեկ առաջադրանքի վրա կենտրոնանալն օգնում է ավելի արագ ավարտել այն՝ առանց մեկ առաջադրանքից մյուսին անցումների վրա ժամանակ ծախսելու։

Հավելենք նաև, որ միանգամից մի քանի առաջադրանքներ կատարելու արդյունքում մեծանում է սխալներ թույլ տալու և կարևոր մանրամասները բաց թողնելու հավանականությունը, իսկ փոփոխություններ կատարելը և սխալներն ուղղելը լրացուցիչ ժամանակ են պահանջում։

 

Վերացրեք ուշադրությունը շեղող գործոնները

Միգուցե հակված եք հաճախակի մուտք գործել սոցցանցեր և ծանոթանալ նորություններին կամ աշխատասենյակում միայնակ չեք, և ձեր գործընկերների խոսակցություններն ու քննարկումները շեղում են ձեզ։ 

Փորձեք ստեղծել այնպիսի միջավայր, որտեղ կկարողանաք կենտրոնանալ աշխատանքի վրա։ Անջատեք հեռախոսը, էլեկտրոնային փոստի և սոցցանցերի ծանուցումները (եթե իհարկե այդ պահին գործնական զանգերի կամ նամակների չեք սպասում), փակեք համակարգչի վրա բացված այն էջերը, որոնք ձեզ անհրաժեշտ չեն։

 

 

Ասեք «Ոչ»

Գործընկերների հետ գիտելիքներով և փորձով կիսվելը, իհարկե, խրախուսելի է, եթե ունեք բավարար ժամանակ։ Սակայն առավել հավանական է, որ, ուրիշներին օգնելու վրա ծախսելով ձեր ժամանակը և ջանքերը, չհասցնեք սեփական գործերը։ Եթե կարծում եք, որ գործընկերոջ խնդրանքը կարող է զգալի ժամանակ խլել, ասեք նրան, որ կցանկանայիք նախ կենտրոնանալ և ավարտին հասցնել ձեր հրատապ գործերը և ապա անդրադառնալ նրա հարցին։

Դուք կարող եք օգնություն առաջարկել, երբ արդեն ավարտել եք ձեր գործերը կամ ձեզ դիմող գործընկերոջն ուղղորդել մեկ ուրիշի մոտ, ով կարող է օգնել նրան տվյալ հարցում։

 

Եվ վերջում ևս մեկ հուշում՝ նայեք ձեր շուրջը։ Ցանկացած միջավայրում կան արդյունավետ աշխատող մարդիկ, որոնցից կարելի է ոգեշնչվել և խորհուրդներ հարցնել։ Միգուցե ձեր գործընկերը կարողանա օգտակար խորհուրդ տալ կամ կիսվել իր դրական փորձով։


 

You may like