Get our free app. It won't take up space on your device
Խորհուրդներ գործատուներին

Ի՞նչ հատկանիշներ հաշվի առնել աշխատանքի ընդունելիս

11/30/2020 | 3489 views

Ժամանակակից աշխարհում, երբ ամեն ինչ չափազանց արագ է փոփոխվում, անհնար է առաջնորդվել մեկ հստակ ու քարացած մոտեցմամբ։ Ցանցակած բնագավառում տեղի են ունենում փոփոխություններ, բազմաթիվ են մարտահրավերները՝ ձեռք բերված գիտելիքները շատ արագ կորցնում են իրենց արդիականությունը, կարիք է լինում անդադար վերապատրաստումների ու կատարելագործման, շրջապատի զարգացման տեմպը շատ բարձր է․․․ այս ամենը կարող է սթրեսային լինել մարդկանց համար։

Աշխատանքը մեծ դեր ունի բոլորիս կյանքում․ մենք օրվա զգալի մասն անց ենք կացնում աշխատանքի մեջ, հաճախ այն հստակ ժամանակահատված չի կազմում, այլ պահանջում է 24/7 ուշադրություն։ Սա նշանակում է, որ էապես փոփոխվել են այն հատկանիշները, որոնց ուշադրություն ենք դարձնում աշխատանքի ընդունելիս։ Համաձայնե‘ք, այսօր մեզնից պահանջվում են այնպիսի հատկանիշներ, որոնց մասին մեր ծնողները չեն լսել։

Ըստ այդմ՝ մարդկային ռեսուրսների կառավարման մասնագետները պետք է ուշիուշով վերլուծեն համաշխարհային և լոկալ աշխատաշուկաներում պահանջվող հմտությունները, փորձեն ճշգրիտ վերհանել, թե որոնք են անհրաժեշտ տվյալ ընկերությունում աշխատելու համար և փորձեն գտնել պահանջներին առավելագույնս համապատասխանող մասնագետների։

Ահա այն կարևոր հատկանիշները, որոնք պետք է հաշվի առնել աշխատանքի ընդունելիս`

  • Հաղորդակցման կարողություն


Սա մեր ժամանակների հրամայականն է։ Աշխատանքի ընթացքում մենք անվերջ հաղորդակցման մեջ ենք՝ թիմակիցների, ղեկավարների, հաճախորդների հետ, հետևապես՝ պետք է գործի դնել հաղորդակցման բոլոր գործիքները՝ դարձնելով աշխատանքը ներդաշնակ ու արդյունավետ, խուսափելով թյուրըմբռնումներից, որոնք կարող են վնասել գործնական հարաբերություններին։ 

Ինչ վերաբերում է օնլայն հաղորդակցությանը, ապա այստեղ ևս կան որոշակի կանոններ՝ շփումը պետք է լինի պարզ, բացառվեն երկիմաստությունն ու թյուրընկալումները։

Հաղորդակցման գերազանց կարողություններով օժտված մասնագետները դառնում են անփոխարինելի աշխատակիցներ՝ կարևոր դեր խաղալով ընկերության զարգացման գործում։

  • Քննադատական և վերլուծական մտածողություն


Սրանք 21-րդ դարի ամենակարևոր հատկանիշներից են, քանի որ այսօր մենք առերեսվում են տեղեկատվական ահռելի հոսքերի, որոնցից պետք է կարողանալ տարբերակել առաջնայինն ու երկրորդականը, ճշմարիտն ու սխալը։ Խոսքը միայն հասարակական-քաղաքական կյանքի մասին չէ, նույն իրավիճակն է նաև մասնագիտական ոլորտում։ Չճշտված մասնագիտական նյութերն արտատպվում են հազարավոր աղբյուրներում, և գրեթե անհնար է լինում պարզել իսկությունը։ Բայց եթե աշխատակիցն օժտված է վերլուծելու կարողությամբ, նա կհամադրի փաստերը և կհասկանա՝ ինչ է արժանահավատ, ինչից է պետք խուսափել։

Նշենք, որ այս երկու հատկանիշները սերտորեն կապված են զարգացած տրամաբանության հետ և օգնում են ընկերություններին խուսափել բազմաթիվ սխալներից։

  • Սովորելու ունակություն


Կարող է թվալ, որ հասուն մասնագետներն արդեն ամեն ինչ գիտեն, ի՞նչ կարիք կա նորը սովորելու։ Բայց այստեղ թաքնված է շատ նուրբ հարց․ սովորել չցանկացող մարդիկ մեծամասամբ մերժում են նորը, առաջընթացը, ճկուն չեն և չեն ցանկանում հարմարվել նոր իրավիճակներում։ Սովորելու հանդեպ բաց լինելը և՛ աշխատակցի, և՛ ընկերության առաջընթացի երաշխիքն են։

Ի դեպ, սովորելու լայն հնարավորություններ կան՝ սկսած հետբուհական կրթությունից մինչև մասնագիտական հեղինակավոր ամսագրեր ու ֆորումներ։

  • Համակարգային մոտեցում


Նախորդ բլոգներում մենք հաճախ ենք անդրադարձել այս հատկանիշի կարևորությանը։ Մեր իրականությունում այլևս տեղ չկա գծային մտածելակերպին, պետք է կարողանալ տեսնել պատկերն ամբողջությամբ՝ այն բաժանելով տրամաբանված բլոկների։ Հակառակ դեպքում մարդիկ կատարում են յուրաքանչյուրն իր աշխատանքը, բայց չեն հասկանում, թե ինչ մեծ, գլոբալ նպատակներ կան։ Դա նման է կարի ֆաբրիկայի՝ ի՞նչ կլինի, եթե հաստոցի աշխատակիցն իմանա, որ պատրաստում է գրպան, բայց չիմանա՝ որտե՞ղ է այն կիրառվելու։ Նա, իհարկե, լավ կկարի գրպանը, բայց ամբողջ կյանքի ընթացքում այդպես էլ չի իմանա, թե ինչ մեծ դեր ուներ այդ փոքր տարրը տաբատի համար։

  • Ճկունություն


Կարծում ենք՝ 2020 թվականը ցույց տվեց, որ առանց այս հատկանիշի պարզապես անհնար է գոյատևել ժամանակակից աշխարհում։ Փոփոխություններն այնքան շատ էին, այնքան տարբեր, որ մենք պարզապես չունեցանք ադապտացվելու ժամանակ։ Ե՛վ առօրյայում, և՛ աշխատանքի մեջ ճկունությունն անփոխարինելի է։ Աշխատակիցները պետք է կարողանան լինել ճկուն ու հարմարվել, հակառակ դեպքում կապի սովորական խափանումն անգամ կարող է բերել մեծ կոլափսի։ Փոփոխությունները բարդ են, բայց դրանից չես փախչի, ուստի պետք է կարողանալ հարմարվել և «համագործակցել» դրանց հետ։

Այսպիսին էին աշխատանքի ընդունելու հարցում ուշագրավ հատկանիշները, որոնց առկայությունն աշխատակիցների մոտ արդյունավետ կդարձնի նրանց աշխատանքը և դրական կլինի ողջ ընկերության համար։

You may like