Ձեր ռեզյումեն պետք է ներառի հիմնական բաժիններ, որոնք, ցանկալի է, որ ներկայացված լինեն ստանդարտ հերթականությամբ՝ արտացոլելով ձեր աշխատանքային փորձը, հմտությունները և ձեռքբերումները: Մեր այսօրվա բլոգում կքննարկենք ռեզյումեի 7 հիմնական բաժինները, կկիսվենք խորհուրդներով, որոնք կօգնեն յուրաքանչյուր բաժնում ճշգրիտ ներկայացնել պահանջվող տեղեկատվությունը։

Կոնտակտներ

Ռեզյումեի սկզբում նշեք կոնտակտային տվյալները: Ներառեք ձեր լրիվ անունը, բնակության վայրը, հեռախոսահամարը, էլ․ փոստի հասցեն և սոցիալական մեդիայի էջի ​​հղումը, եթե այն պատկերացում է տալիս ձեր մասնագիտական գործունեության մասին, ինչպես նաև պորտֆոլիոն: Համոզվեք, որ ձեր անձնական տվյալները ճիշտ են լրացված, որպեսզի հնարավոր գործատուները կարողանան հեշտությամբ կապ հաստատել ձեզ հետ:

Ամփոփ տեղեկատվություն ձեր մասին

Այս բաժնում հակիրճ ընդգծեք ձեր մասնագիտական ​​որակավորումների և ձեռքբերումների ամենակարևոր կողմերը։ Օրինակ՝ Բազմաթիվ ոլորտներում ավելի քան 10 տարվա փորձ ունեցող վեբ դիզայներ:

Աշխատանքային փորձ

Նշեք աշխատանքային փորձը հակառակ ժամանակագրական հաջորդականությամբ՝ սկսած ձեր ընթացիկ կամ ամենավերջին պաշտոնից: Ներառեք միայն մասնագիտական ​​փորձը, որը վերաբերում է այն աշխատանքին, որի համար դիմում եք: 

Կրթություն

Նշեք կրթական հաստատությունը, մասնագիտությունը, աստիճանը և ավարտելու ամսաթիվը: Եթե դեռ չեք ավարտել ուսումը, նշեք ավարտելու սպասվող ամսաթիվը:
 

Հմտություններ

Ներառեք բոլոր համապատասխան հմտությունները, ինչպես նաև հմտությանը տիրապետելու մակարդակը՝ բոլոր այն դեպքերում, երբ դա հնարավոր է։ Կարող եք ներառել և՛ տեխնիկական, և՛ փափուկ հմտությունները: Նշեք թվային ծրագրերը, որոնցով կարողանում եք աշխատել, ինչպես նաև լեզուների իմացությունը։

Սերտիֆիկացում և վկայականներ

Այս բաժինը պարտադիր է նրանց համար, ովքեր անցել են մասնագիտական սերտիֆիկացում։ Նշեք հավաստագրման անվանումը, կազմակերպությունը, որն այն շնորհել է, և ստացման ամսաթիվը: 

Կոչումներ և մրցանակներ

Այս բաժինը ևս պարտադիր է միայն նրանց համար, ովքեր ստացել են մասնագիտական ​​պարգևներ ու մրցանակներ: Ներառեք մրցանակի անվանումը, կազմակերպությունը, որը շնորհել է այն, և ստանալու ամսաթիվը:

Job.am-ում կարող եք անվճար ստեղծել ձեր ռեզյումեն, որը ներառում է բոլոր անհրաժեշտ բաժինները, իսկ ձեզ մնում է միայն լրացնել դրանք։ 

Այն հնարավորություն կտա հարթակում մեկ քլիքով դիմել տարբեր հաստիքների։ Կարող եք նաև ներբեռնել ձեր ռեզյումեն՝ այլ ձևաչափով աշխատանքի դիմելիս օգտագործելու նպատակով։