Get our free app. It won't take up space on your device
խորհուրդներ դիմորդներին

Նշաններ, որոնք վկայում են, որ աշխատանքի հայտարարությունը կարող է խաբեություն լինել

3/29/2024 | 2524 views

Լավ աշխատանք գտնելն իսկապես դժվար է, հատկապես, եթե հաշվի առնենք, որ բազմաթիվ աշխատանքի առաջարկների ետևում ոչ միշտ են կանգնած ազնիվ գործատուներ: Հաճախ բարդ է լինում իրական հնարավորությունները տարբերել կեղծ առաջարկներից: Այնուամենայնիվ, կան նման խարդախություններին բնորոշ մի քանի հիմնական հատկանիշներ, որոնց իմացությունը ձեզ կօգնի հուսալի և իրական հնարավորություններ փնտրել:

 

Մեր այսօրվա բլոգում կքննարկենք, թե ինչին է հարկավոր ուշադրություն դարձնել աշխատանքի հայտարարության մեջ, որպեսզի կարողանաք հասկանալ՝ դա իրական հնարավորություն է, թե քողարկված խարդախություն:

 

 

Ձեզ անմիջապես աշխատանք են առաջարկում

Իհարկե միշտ չէ, որ հարկավոր է զգուշանալ, երբ հավաքագրողը կապ է հաստատում ձեզ հետ, նշում, որ գտել է ձեր ռեզյումեն առցանց հարթակում։ Զգուշանալ պետք է, սակայն, երբ ձեզ անմիջապես աշխատանք են առաջարկում, իսկ եթե սրան գումարվում են նաև անսովոր հարցերը, ապա հնարավոր է, ձեզ փորձում են խաբել և անձնական տեղեկատվություն ստանալ ձեր մասին։ Երբ ձեզ հետ կապ է հաստատում հավաքագրման մասնագետը, խնդրեք պարզաբանել, թե մասնավորապես որ հարթակում է նա գտել ձեր ռեզյումեն։ Հարցրեք ընկերության անունը և հիշեք, թե արդյոք ուղարկել եք նրանց ձեր ռեզյումեն։

 

Անմիջապես աշխատանքի առաջարկ ստանալը՝ առանց հաստիքի համար դիմելու, հավաքագրողի հետ խոսելու կամ հարցազրույցի մասնակցելու, պետք է ընդունել որպես նախազգուշական նշան: Կազմակերպությունում աշխատելու անհապաղ առաջարկը, հատկապես այն դեպքում, եթե առաջինը դուք չեք կապ հաստատել ընկերության հետ, կարող է նշանակել, որ աշխատանքի հնարավորությունը խաբեություն է կամ խոսքը նույնիսկ ոչ օրինական գործունեության մասին է։

 

 

Աշխատավարձը չափազանց բարձր է

Եթե նկատում եք, որ նկարագրության մեջ նշվում է պաշտոնի համար անսովոր բարձր աշխատավարձ, ապա դա կարող է նախազգուշացնող նշան լինել: Օրինակ, եթե օրական մի քանի ժամ զբաղվածության դիմաց նշված է չափազանց բարձր վարձատրություն, ապա նախքան դիմելը ավելի մանրամասն ուսումնասիրեք ընկերությունը և պաշտոնը:

 

Գրաֆիկը չափազանց ճկուն է

Թեև բազմաթիվ ընկերություններ ապահովում են ճկուն աշխատանքային ժամեր, որոնք նպաստում են աշխատանքի և անձնական կյանքի հավասարակշռությանը, սակայն եթե աշխատանքը չափազանց ճկուն է թվում, դա կարող է լինել ևս մեկ նախազգուշացնող նշան: Հատկապես անսովոր բարձր վարձատրության հետ մեկտեղ ոչ սովորական ժամանակացույցը կարող է վկայել, որ դա չափից դուրս լավ առաջարկ է, որպեսզի իրական լինի:

 

Ուշադիր եղեք, եթե հանդիպում եք առաջարկների, որոնք խոստանում են, որ դուք կաշխատեք շաբաթական միայն մեկ կամ երկու օր, մինչդեռ բարձր եկամուտ կստանաք։ Այս դեպքում լրացուցիչ ուսումնասիրություններ իրականացրեք նախքան ձեր ռեզյումեն ուղարկելը:

 

 

Աշխատանքային պահանջներն անորոշ են

Իրական աշխատանքի հնարավորություններն ունեն բավականին կոնկրետ պահանջներ, որոնք ներկայացված են նկարագրության մեջ: Խաբեության պարագայում կնկատեք, որ պահանջները և հաստիքի հետ կապված այլ մանրամասներ բավականին անորոշ են: Օրինակ, զգույշ եղեք աշխատանքի առաջարկներից, որոնցում թեկնածուներից միայն պահանջվում է գրագետ լինել, տարրական համակարգչային գիտելիքներ ունենալ կամ այլ պարզ և ոչ միանշանակ չափանիշներ, որոնց գրեթե յուրաքանչյուրը կարող է համապատասխանել:

 

Ընկերությունը պահանջում է անձնական տեղեկատվություն աշխատանքի ընդունելուց առաջ

Նոր աշխատակիցներ ընդունելիս ընկերությունը սովորաբար պահանջվում է անձնական փաստաթղթեր: Հիշեք, որ դա անհրաժեշտ է դառնում միայն այն բանից հետո, երբ ընդունվում եք աշխատանքի և պայմանագիր պետք է ստորագրեք գործատուի հետ։ Եթե ​​հավաքագրողը կամ գործատուն խնդրում է որևէ անձնական տեղեկատվություն, բացի ձեր հիմնական կոնտակտային տվյալներից, դա ընդունեք որպես այդ ընկերությունից խուսափելու նշան։

 

 

Գործատուի կոնտակտային տվյալները բացակայում են

Բազմաթիվ կեղծ աշխատանքի հնարավորություններում բացակայում են կոնտակտային տվյալները կամ ներկայացվում են կազմակերպության մասին անորոշ մանրամասներ: Եթե ​​նկատում եք, որ ընկերության մասին հիմնական տեղեկատվությունը բացակայում է, փորձեք համացանցում որոնել ընկերության կայքը կամ էլեկտրոնային փոստի հասցեն: Եթե ​​չեք կարողանում գտնել տեղեկատվություն տվյալ ընկերության գտնվելու վայրի, անձնակազմի կամ այլ մանրամասների մասին, ապա փնտրեք այլ աշխատանք։

 

You may like