Շատերի կարծիքով՝ ամառը աշխատանքի որոնման համար ամենաբարենպաստ շրջանը չէ։ Տարածված համոզմունք կա, որ այս ամիսներին ընկերություններն ավելի քիչ են նոր աշխատակիցներ ընդունում, քանի որ ղեկավարներն ու հավաքագրողները հաճախ արձակուրդում են, իսկ աշխատանքի ընդունման գործընթացները դանդաղում են։ Սակայն արդյո՞ք դա նշանակում է, որ պետք է մինչև աշուն հետաձգել աշխատանք փնտրելը։ Իրականում՝ ոչ։

Թեև որոշ ընկերություններ կարող են ժամանակավորապես դանդաղեցնել հավաքագրման գործընթացը, շատ կազմակերպություններ շարունակում են ակտիվորեն համալրել իրենց թիմերը նաև ամռան ամիսներին։ Բացի այդ, միշտ կան հաստիքներ, որոնք հնարավոր չէ երկար ժամանակ թափուր թողնել։ Այդ պատճառով գործատուները շարունակում են հրապարակել նոր հայտարարություններ և անցկացնել հարցազրույցներ՝ անկախ տարվա եղանակից։

Ամառը կարող է նույնիսկ որոշ առավելություններ տալ աշխատանք փնտրողներին։ Ամենակարևորներից մեկը մրցակցության նվազումն է։ Շատ թեկնածուներ համոզված են, որ ամռանը նոր աշխատանք գտնելը դժվար է, ուստի ժամանակավորապես դադարեցնում են որոնումները։ Արդյունքում, որոշ հաստիքների համար դիմողների թիվը նվազում է, և ձեր ինքնակենսագրականը կարող է ավելի հեշտ նկատվել հավաքագրողների կողմից։

Այս շրջանը նաև հարմար ժամանակ է ձեր մասնագիտական ներկայությունը բարելավելու համար։ Եթե դեռ չեք թարմացրել ռեզյումեն կամ LinkedIn-ի էջը, հիմա ճիշտ ժամանակն է դա անելու համար։ Վերանայեք ձեր փորձը, ավելացրեք նոր հմտություններ, թարմացրեք պորտֆոլիոն: Իսկ թե ինչպես օգտագործել այս ժամանակահատվածը՝ մասնագիտական հմտությունները զարգացնելու համար, կարդացեք մեր այս բլոգում։

Մի սահմանափակվեք միայն աշխատանքի հայտարարություններին արձագանքելով։ Հետևեք ձեզ հետաքրքրող ընկերություններին, մասնակցեք մասնագիտական միջոցառումների, վեբինարների կամ առցանց քննարկումների, ընդլայնեք ձեր մասնագիտական կապերը։ Շատ դեպքերում նոր հնարավորությունները բացվում են հենց ծանոթությունների և շփումների շնորհիվ։

Կարևոր է նաև պահպանել հետևողականությունը։ Եթե մի քանի դիմումից հետո պատասխան չեք ստանում, դա չի նշանակում, որ ամառը «անհաջող» ժամանակաշրջան է։ Աշխատանքի որոնումը հաճախ ժամանակ և համբերություն է պահանջում, իսկ յուրաքանչյուր ուղարկված դիմում մեծացնում է հաջողության հասնելու հավանականությունը։

Այսպիսով, եթե մտածում էիք աշխատանք փնտրելը հետաձգել մինչև սեպտեմբեր, գուցե արժե վերանայել այդ որոշումը։ Ամառը կարող է լինել հենց այն շրջանը, երբ մրցակցությունն ավելի քիչ է, իսկ դուք՝ ավելի պատրաստ նոր հնարավորություններին։ Հետևողականությունը, լավ պատրաստված ինքնակենսագրականը և ակտիվ մոտեցումը տարվա ցանկացած եղանակի կարող են ձեզ ավելի արագ մոտեցնել ցանկալի աշխատանքին։