Ռեզյումեում նշված անձնական հատկանիշները ոչ միայն լրացնում են ձեր մասնագիտական փորձն ու հմտությունները, այլև ցույց են տալիս՝ ինչպես եք աշխատում թիմում, ինչպես եք արձագանքում դժվարություններին և որքան արագ եք հարմարվում փոփոխություններին։ Դրանք օգնում են գործատուին հասկանալ՝ ինչպիսի մարդ եք դուք աշխատանքի միջավայրում, և արդյոք կհամապատասխանեք թիմին։

Առավել հաճախ գնահատվող հատկանիշներից են․

• պատասխանատվություն,
   
• հաղորդակցվելու ունակություն,
   
• սթրեսակայունություն,
   
• արագ սովորելու կարողություն։

Ժամանակակից աշխատաշուկայում կարևոր են նաև հետևյալ հատկանիշները․

• Ադապտիվություն – արագ հարմարվել նոր պայմաններին։
   
• Բաց լինել նորարարություններին – խոսքը հատկապես տեխնոլոգիական նոր լուծումները յուրացնելու և աշխատանաքում կիրառելու մասին է:
   
• Դիմացկունություն – հաղթահարել փորձությունները և շարունակել առաջ շարժվել։
   
• Քննադատական մտածողություն – վերլուծել տեղեկատվությունը և գտնել ճիշտ լուծումներ։
   
• Էմոցիոնալ ինտելեկտ – հասկանալ մարդկանց և կառուցել առողջ հարաբերություններ։
   

Տարբեր ոլորտներում տարբեր հատկանիշներ են ավելի կարևոր։ Ռեզյումեում նշեք այն հատկանիշները, որոնք համապատասխանում են ձեր ընտրած հաստիքի պահանջներին։ Օրինակ, Ծրագրավորողի համար կարևոր հատկանիշներ են վերլուծական մտածողությունը, համբերատարությունը, հետաքրքրասիրությունը, վաճառքների մենեջերի համար՝ ինքնավստահությունը, հաղորդակցությունը, համառությունը, դիզայների համար՝ ստեղծագործական մոտեցումը և մանրուքների հանդեպ ուշադրությունը, մարքեթոլոգի համար՝ կրեատիվությունը, քննադատական մտածողությունը, լսարանի ըմբռնումը:

Ահա մի քանի խորհուրդներ, որոնք կօգնեն ճիշտ ներկայացնել ձեր հատկանիշները ռեզյումեում։

• Մի՛ սահմանափակվեք ստանդարտ բառերով։ Փոխարենը ցույց տվեք օրինակով՝ ինչ իրավիճակում է այդ հատկանիշը ձեզ օգնել։
   
• Հնարավորության դեպքում նշեք կոնկրետ արդյունքներ․ օրինակ՝ «սովորեցի CRM համակարգն ընդամենը երկու շաբաթում և կարողացա արագացնել հայտերի մշակման գործընթացը 1,5 անգամ»։
   
• Պատրաստ եղեք հարցազրույցին բերել իրական օրինակներ, որոնք հաստատում են ձեր նշած հատկանիշները։
   

Անձնական հատկանիշները կարող եք տեղադրել «Հիմնական հմտություններ», «Իմ մասին» կամ «Լրացուցիչ տեղեկություններ» բաժիններում։