Հարցազրույցի ամենակարևոր պահը հենց սկիզբն է։ Առաջին մի քանի րոպեները կարող են որոշել հանդիպման ամբողջ ընթացքը՝ ինչքան բաց կլինի թեկնածուն, ինչ տպավորություն կստանաք նրա մասին և արդյոք նա կցանկանա աշխատել ձեր ընկերությունում։ Ճիշտ մեկնարկը ստեղծում է վստահության և հարմարավետության միջավայր թեկնածուի համար։ Հիշեք՝ ոչ միայն դուք եք գնահատում թեկնածուին, այլև վերջինս էլ իր հերթին գնահատում է ձեր կազմակերպությունը։

Ինչպես սկսել հարցազրույցը

1. Սահմանեք ձեր նպատակը (մինչ հարցազրույցը)

Լավ հարցազրույցը սկսվում է դեռ մինչև հանդիպումը։ Հստակ հասկացեք՝ ինչպիսի թեկնածուի եք փնտրում և որ հարցերն են իսկապես կարևոր։ Ուսումնասիրեք թեկնածուի CV-ն, նշեք հետաքրքիր կամ կասկածելի հատվածները, պատրաստեք նպատակային հարցեր:

2. Ներկայացեք և ստեղծեք հարմար մթնոլորտ

Սկսեք պարզ ու ջերմ ներկայացմամբ՝ ասեք ձեր անունը, ներկայացրեք ձեր դերը ընկերությունում, ողջունեք թեկնածուին։ Փոքր ժեստերը, օրինակ՝ ջուր առաջարկելը կամ թեթև զրույցը, օգնում են մարդուն հանգստանալ։

3. Ստեղծեք կապ 

Մի շտապեք անմիջապես անցնել հիմնական հարցերին։ Փորձեք ստեղծել մարդկային կապ՝ մեկնաբանեք CV-ից ինչ-որ հետաքրքիր բան, հարցրեք հոբբիների մասին կամ նույնիսկ խոսեք եղանակից: Սա օգնում է կոտրել լարվածությունը և դարձնել զրույցը ավելի բնական։

4. Խնդրեք թեկնածուին պատմել իր մասին

Սա դասական, բայց կարևոր քայլ է։ «Պատմեք ձեր մասին» հարցի փոխարեն կարող եք օգտագործել ավելի կոնկրետ հարցեր, օրինակ՝ «Ի՞նչն է ձեզ հետաքրքրել այս պաշտոնում», «Ինչպե՞ս եք հասել այս փուլին ձեր կարիերայում»։ Սա օգնում է ստանալ ավելի հստակ և արժեքավոր պատասխաններ։

5. Բացատրեք հարցազրույցի ընթացքը

Շատ թեկնածուներ անհանգստանում են անորոշությունից։ Ուստի կարևոր է պարզ ասել, թե ինչ փուլերից է բաղկացած հարցազրույցը, քանի փուլ կլինի ընդհանուր գործընթացում, երբ սպասել պատասխանի։ Սա ավելացնում է վստահություն և պրոֆեսիոնալիզմ։

6. Անցեք հիմնական հարցերին

Երբ մթնոլորտը արդեն ձևավորված է, կարող եք անցնել հիմնական հարցերին։ Եթե սկիզբը հաջող է, թեկնածուն կլինի ավելի բաց, իսկ դուք՝ ավելի հեշտ կգնահատեք նրա փորձն ու հմտությունները։