Հաշվետար

«ՕՎԱԼ» պլաստիկ ընկերությունը զբաղվում է մեկանգամյա օգտագործման պլաստիկե և թղթե տարաների արտադրությամբ և տպագրությամբ:

Հայաստանի առաջին և ամենամեծ պլաստիկ ընկերության արտադրամասում միանգամից աչք է շոյում հարուստ բնությունը. մոտ 3 հեկտար տարածքի մեծ մասը լի է ծաղիկներով և պտղատու ծառերով: Դա այնքան անհավանական է թվում, բայց հասկանալի է դառնում, երբ ծանոթանում ես հիմնադրի՝ Վարուժան Խալաթյանի հետ: Կյանքի մեծ մասը նա նվիրել է սիրելի քաղաքի կանաչապատման աշխատանքներին, ու ահա մի օր՝ կյանքի և իրադարձությունների բերումով, սկսում է զբաղվել պլաստիկի արտադրությամբ: 
  
Դա 1990-ականներին էր, երբ Հայաստանում պլաստիկե տարաներ չկային: Կաթնամթերքը ապակե շշերով էր վաճառվում, որի սանիտարահիգիենիկ վատ վիճակի մասին հաճախ էր խոսվում: Այդ տարիներին մի քանի ընկերություն կար, որոնց Վարուժան Խալաթյանն առաջարկում է պլաստիկե, հիգիենիկ սննդային տարաներ: Առաջարկը հավանության է արժանանում:

1995թ.-ին Հայաստանում սկսվում է պլաստիկի արտադրությունը:
 
Սկզբում միայն ընտանիքի անդամներով էին՝ Վարուժան Խալաթյանը, կինը, որդին, դուստրերը, իսկ այսօր արդեն գործարանն ապահովում է ավելի քան 500 աշխատատեղ:

Առաջին պլաստիկե տարան

Առաջին պլաստիկե տարան բոլորիս հայտնի 200-գրամանոց թթվասերի բաժակն էր, հետո՝ կես-լիտրանոց մածունի տարան: Սկզբնական շրջանում արտադրվում էր ընդամենը 3 տեսակ պլաստիկե տարա, իսկ այսօր արդեն այդ թիվը գերազանցում է 1500-ը:

Հաջողությունը հեշտ չի տրվում, բայց հաջողության գլխավոր գրավականը գործը միշտ ավարտին հասցնելն է: Վարուժան Խալաթյանը հենց այդպիսինն է՝ երբեք չի եղել որևէ նախաձեռնություն, որը կիսատ թողնի: «Երջանկահիշատակ հայրս ասում էր՝ եթե գոտիդ ամուր կապես ու գործիդ հետևից գնաս, անպայման կհաջողես», - հիշում է Վ․ Խալաթյանը:

Ընկերությունն այժմ զբաղվում է նաև պլաստիկի վերամշակմամբ և օգտագործում է վերամշակված հումքը արկղեր, ջրահեռացման ցանցեր, քարի կաղապարներ և նմանատիպ այլ արտադրանք ստանալու համար։ Oval Pack-ն օր օրի ընդլայնվում է: Նոր պահանջարկին համապատասխանելու համար գործարանն անընդհատ վերազինվում է՝ համալրվելով գերժամանակակից սարքավորումներով։  Այժմ ընկերության ուղղվածությունը և պլանները թղթե տարաների փաթեթավորման զարգացմանն է միտված, որի անհրաժեշտությունը և պահանջարկը օրեցօր մեծանում է։

Այսօր Oval Pack գործարանը ամբողջությամբ փորձում է բավարարել այն պահանջարկը, որն ունի սպառողը։ Տևական ժամանակ է, որ Oval Pack-ը ընդգրկված է Հայաստանի խոշոր հարկատուների ցանկում: Oval Pack-ն անում է ամեն ինչ մեր երկրի տնտեսական աճն ավելացնելու համար։